Հեռուստատեսության և ռադիոյի հանձնաժողովը Հայաստանում հեռարձակվող ռուսական հեռուստաալիքներին մեղադրում է «Հայաստանի պետական ինստիտուտներին և քաղաքացիներին հասցեագրված վիրավորական արտահայտություններ, խեղաթյուրված գնահատականներ, փաստերի փոխարեն հուզական ու ագրեսիվ բնորոշումներ տարածելու» համար և բարձրացնում դրանց վերահեռարձակումը դադարեցնելու հարցը:
Այսօր տարածած հայտարարության մեջ նշված է.
«Հանրային մուլտիպլեքսը չպետք է օգտագործվի օտարերկրյա քաղաքական օրակարգերի սպասարկման համար, Հայաստանի տեղեկատվական տարածքը պետք է զերծ լինի ցանկացած օտարերկրյա ուժի մանիպուլյատիվ, քարոզչական և սադրիչ ներգործությունից, ներքին քաղաքական իրավիճակին միջամտելու փորձերից։ Մեր առաջնային պարտականությունն է պաշտպանել հանրային շահը, ազգային արժանապատվությունը և ՀՀ քաղաքացիների՝ հավասարակշռված ու արժանահավատ աղբյուրներից տեղեկատվություն ստանալու իրավունքը»։
Կարգավորող այս անկախ մարմինը հղումներ է արել 2020-ի դեկտեմբերին Հայաստանի ու Ռուսաստանի կառավարությունների միջև ստորագրված համաձայնագրին ու նշել, որ Ռուսաստանի պետական հեռուստաընկերությունները պարբերաբար խախտել են միջկառավարական այս համաձայնագրի առնվազն երեք դրույթները:
Օրինակ՝ ռուսաստանյան հեռուստաալիքները «պարտավորվել են պահպանել Հայաստանի օրենսդրությունը, բացառել հայ ժողովրդի և ազգային արժեքների նկատմամբ վիրավորական բովանդակությամբ հաղորդումները, ինչպես նաև միջամտությունը Հայաստանի ներքաղաքական կյանքին»։ Մեկ այլ կետով ռուսական կողմը պարտավորվել է Հայաստանի հանրային հեռուստատեսությանը տրամադրել «ունիվերսալ հեռարձակման լիցենզիա», որն իրավունք կտար հեռարձակում իրականացնել Ռուսաստանի ամբողջ տարածքում, բայց այդպես էլ Հայաստանի հանրային հեռուստատեսությունն արդեն 4,5 տարի այդ հնարավորությունը չունի, նշված է հանձնաժողովի այսօրվա հայտարարության մեջ։
Մինչ հանձնաժողովը պատրաստվում էր հրապարակել այս բավականին կոշտ հայտարարությունը, Բարձր տեխնոլոգիաների արդյունաբերության նախարարը, որ այսօր Վանաձորում էր, ռուսական հեռուստաալիքները փակելու մասին որևէ դիրքորոշում չասաց: Տարածված հայտարարությունից րոպեներ առաջ Մխիթար Հայրապետյանը այդպես էլ չպատասխանեց «Ազատությանը»՝ արդյոք կառավարությունը քննարկու՞մ է այդ հարցը, չնայած հենց նրա ղեկավարած գերատեսչությունն է պատասխանատու դրա համար:
«Առաջիկայում կառավարությունը դիրքորոշում կհայտնի այդ հարցի կապակցությամբ», - նշել է Հայրապետյանը:
Ընդամենը երեք օր առաջ խորհրդարանի խոսնակ Ալեն Սիմոնյանն իր ճեպազրույցում ռուս հաղորդավարներին «դեգեներատ» էր անվանել, ասել, թե «նրանց ելույթներն «իրոք վնասում են հայ-ռուսական հարաբերություններին», ու որ շատ լրջորեն պետք է արդեն քննարկել ռուսական հեռուստաալիքների հեռարձակումը Հայաստանում դադարեցնելու հարցը:
Ռուսական ալիքների մասին հայտարարությունից հետո ԱԺ նախագահ Ալեն Սիմոնյանն իր տելեգրամյան ալիքում պատասխանել էր իր խոսքերի վերաբերյալ ռուսական արձագանքներին: Դարձյալ շեշտել էր, թե ռուսական ալիքները «վատթարացնում են հայ-ռուսական հարաբերությունները»:
«Բամբասանքներով վիրավորում են Հայաստանի ընտրված իշխանությանը, կասկածի տակ են դնում Հայաստանի ինքնիշխանությունը և գոյությունը, ցույցերի կոչեր են անում ՝ նշելով ամսաթիվ, ժամ, վայր, դատապարտում են հայ իրավապահներին և միջամտում Հայաստանի ներքին գործերին», - գրել էր Ալեն Սիմոնյանն ու հարց հնչեցրել՝ «ի՞նչ կասեիք, եթե հայկական հեռուստաալիքներում հաղորդավարները վիրավորեին ՌԴ նախագահին և ղեկավարությանը»:
Սիմոնյանի ուղերձը ավարտվում էր կտրուկ ուլտիմատումով՝ «Սա պետք է դադարի։ Կա՛մ դուք կդադարեցնեք, կա՛մ մենք կանենք դա»։
Արդյոք կառավարությունը քննարկումներ սկսե՞լ է ու ի՞նչ ձևաչափով, պարզ չէ: Ոլորտը համակարգող նախարար Մխիթար Հայրապետյանն այսօր այդպես էլ որևէ բառ չասաց, բացի այն, որ ավելի ուշ դիրքորոշում կհայտնեն: Դիտարկումը, թե խորհրդարանի ղեկավարն արդեն հայտնել է դիրքորոշում, արդյո՞ք նախարարը դրան համաձայն է, դարձյալ պատասխան չեղավ. պատասխան ստանալու «Ազատության» հետևողական հարցադրումները նախարարին դուր չեկան:
Օրվա ավարտին արդեն հայտնի դարձավ, որ այս հարոց Երևանում ՌԴ դեսպանը կանչվել է ԱԳՆ, նրան հանձնվել է հայտագիր: Այս մասին հայտնում է «Ռադար Արմենիան»:
Հայկական կողմը առաջին անգամը չէ, որ բողոքում է ռուսական ալիքների բովանդակությունից, նախորդ տարիներին ևս դրանց հեռարձակումը դադարեցնելու քննարկումներ են եղել, անգամ որոշ ժամանակով որոշ հաղորդումներ արգելափակվել են, բայց դրանից այն կողմ ավելի կտրուկ քայլեր չեն եղել:
